E ardhmja e përbashkët europiane, tashmë një monument në qytetin e Fierit

Një simbolikë e bukur në qëndër të qytetit. Është  kjo dhurata që po bën Bashkia Fier dhe biznesi i qytetit në përkujtim të festës së 100-vjetorit të Pavarësisë. Ndërtuesit kanë filluar tashmë punën për ndërtimin e platformës së betontë, ku do të instalohet monumenti i titulluar ”Europa Plaza”, një glob shumëngjyrësh alumini, me dimension sa një e treta e rrethrrotullimit të sheshit “Fitorja”. Në të do të vendosen edhe 27 shtiza flamujsh të vendeve të BE. Sipas nënkryetarit të Bashkisë Fier, Flamur Mato, ky  simbol që po ndërton bashkia, në kooperim me  kompaninë private ”Alb-Star”, ka vlera shumëdimesionale.

“ ‘Europa Plaza’, është një monument artistik unikal, i konceptuar si një vepër arti, si një monument lavdie i qytetit, si një monument i lirikës fierake, i shpirtit të gjerë e dashurisë së tij të pafund. Simbolikisht, aty memorizohet e shkuara e përgjakur, shkatërruar nga luftrat dhe e ardhmja e përbashkët e familjes së madhe europiane”,-thekson Mato.

Sipas Matos ky monument do t’i shërbejë jo vetëm ruajtjes së identitetit kombëtar dhe aspiratës europiane, por do të ketë impakt të fuqishëm  mbi turizmin e qytetit të Fierit, pasi është i pari dhe i vetmi i këtij lloji.

“Monumenti  do jetë pikë e pashmangshme për të gjithë turistët që do vijnë në qytet e që do dalin fotografi përpara tij, pas promocionit që ne do t’i bëjmë në të gjitha rrjetet e komunkimit  në internet,si; facebook, tëitter etj. e deri te botimet e shumta e fletëpalosjeve. Ndërkohë, vlen të thuhet që ndriçimi me anë të projektorëve do t’i japë  një vlerë shtesë sheshit qendror të Fierit në orët e natës”,-tha Mato.

Sipas skulptorit Fate Velaj, ideator dhe realizues i këtij projekti, ky simbol reflekton, ruan dhe përcjellë vlerat kombëtare, por njëkohësisht i pasuron  ato me frymën e re të familjes Europiane.

”Ne do ta përfundojmë këtë simbol të lavdisë dhe krenarisë historike para 28-Nëntorit dhe do t’i ftojmë të gjithë ambasadorët e vendeve të Europës, të vijnë të ngrenë secili flamurin e shtetit të vet në këtë memorial, që përcjellë ëndrrën e bukur për një të ardhme të përbashkët”,- tha Velaj.

Ndërkohë, sipas presidentit të firmës “Alb-Star”, Sadik Ismailaj, kjo firmë, e cila ka ekskluzivitetin e  investimit dhe që po punon intensivisht për përfundimin në kohë të globit, ky i fundit do të ketë një diametër  7 m dhe lartësi 3m.

“Ky glob është, padyshim, simbol i vlerave unviversale dhe botës perëndimore. Ai pritet t’i japë qytetit një performancë  edhe më të hijshme në këtë 100- vjetor. Diametri i tij do të jetë 7 dhe lartësia 3 metër. Globi do të ketë ngjyrë blu dhe bojëqielli për të simbolizuar mëngjeset e pastra europiane, por edhe nuancat e së kuqes si kujtesë historike për luftrat e përgjakshme”,-ka vijuar Ismailaj.

Në trupin e këtij ndërtimi, do të vendosen 27 flamuj, që përfaqësojnë 27 shtetet  e Bashkimit Europian. Ky investim është një performacë artistike me frymëzim modern, që shpreh  edhe aspiratat e qytetarëve  fierakë për t’u integruar në BE.