Kryetari i Bashkisë Fier, Baftjar Zeqaj merr pjesë në përurimin e shtatores “Nënë Tereza” në Cleveland të SHBA.

  

Kryetari i Bashkisë Fier, Baftjar Zeqaj, i shoqëruar nga delegacioni zyrtar mori pjesë në përurimin e Kopshtit Kulturor Shqiptar “Nënë Tereza” në Cleveland të SHBA. Ceremonia u zhvillua në Kopshtin multikulturor “Rockefeller”. Kryebashkiaku Zeqaj ka qenë në këtë përurim së bashku me presidentin shqiptar Bujar Nishani, i cili u shpreh se Nënë Tereza ka zhdukur kufijtë duke i afruar njerëzit me njëri-tjetrin dhe e vlerësoi shenjtoren si dritën e shpresës dhe respektit. Po ashtu, Zeqaj, nga ana e vetë, nderoi humanisten shqiptare, duke e quajtur atë krenari për mbarë kombin tonë. Në këtë veprimtari të organizuar nga Shoqata Shqiptaro-Amerikane e Clevelandit merrnin pjesë, po ashtu, ambasadori i Shqipërisë në Shtetet e Bashkuara të Amerikës, Gilbert Galanxhi, kryetari i Bashkisë së Clevelandit, Frank Jackson, kreu i shoqatës Adem Meta, këshilltarja bashkiake dhe presidentja e shoqatës Dona Brady, përfaqësues të diasporës shqiptare dhe qindra qytëtarë të Clevelandit. Pasi u mbajtën fjalimet e rastit, u zbulua edhe shtatorja kushtuar “Nënë Terezës”. Ky aktivitet ishte një kontribut i Bashkisë së Fierit dhe asaj të Clevelandit në saj edhe të binjakëzimit të këtyre dy bashkive. Po ashtu, kontribut, që u vlerësua, dha edhe Shoqata Shqiptaro-Amerikane në Clevelan, e cila u nderua nga Presidenti i Republikës, Bujar Nishani me Urdhrin “Naim Frashëri i Artë”, për punën e palodhur në promovimin e kulturës dhe imazhit të Shqipërisë dhe shqiptarëve në Cleveland.