Kryetari i Bashkisë Fier, Baftjar Zeqaj: “Ky, viti i investimeve madhore për qytetin”

       Fieri, destinacion turistik

Zhvillimi i turizmit dhe i kulturës, sporti dhe ndihma për njerëzit në nevojë janë evidentuar si prioritetet kryesore nga ana e kryebashkiakut të Fierit, Baftjar Zeqaj. Ky i fundit, sqaron pse u duhet dhënë hapësirë, pikërisht  këtyre tre fushave:

”Kultura dhe turizmi, sporti dhe shtresat në nevojë  janë tri shtyllat bazale të këtij katërvjeçari, pa lënë mënjanë padyshim edhe investime të tjera, të cilat do të kenë vëmendjen e duhur në vazhdimësi.

Do të insistojmë në zhvillimin e turizmit kulturor, arkeologjik apo historik, pasi Fieri është vendi i bekuar që ka resurse në të gjitha këto fusha. Sot, ky qytet është vendi i potencialit historik, me pika arkeologjike që tejçojnë jo vetëm vlera si të tilla, por kanë të gdhendura në brendësi datime historike, epoka të ndryshme të lidhura ngushtësisht me periudha që kanë tërhequr vëmendjen brenda dhe jashtë kufijve. Fieri do të kthehet në kryeqendrën e kulturës, pasi vetë qytetarët nuk mund ta kuptojnë dot qytetin e tyre pa këtë shenjim, që përbën njëherësh dhe një nga emblemat kryesore të Fierit.

Sporti është renditur i dyti për nga rëndësia. Është parë në një plan të gjerë, duke i kushtuar një vëmendje të veçantë  për një përfshirje sa më masive të të rinjve në disiplina të ndryshme sportive. Ndërtimi i Pallatit të Sportit është një nga investimet që do të zgjidhë njëherë e përgjithmonë ngërçin e krijuar, jo vetëm për lojërat me dorë, por edhe për t’u ardhur në ndihmë sporteve të tjera, si mundjes, boksit etj. Klubi shumësportësh “Apolonia” ka dhuruar rezultate dinjitoze në sporte të ndryshme, duke i dhënë tonin boksit, çiklizmit, basketbollit të femrave etj. Po kështu, një projekt i rëndësishëm është edhe ndërtimi i kalçetove nëpër shkolla.

Prioritet tjetër do të jetë vëmendja ndaj shtresave në nevojë, familjeve me probleme sociale dhe ekonomike. Në këtë kuadër, gjatë 2012 - tës, do të përfundojë qendra multifunksionale për personat me aftësi të kufizuar, do të ngrihet një qendër social - kulturore për moshën e tretë, po ashtu, prioritet do të ketë krijimi i një miniqendre për të verbrit, paraplegjikët dhe tetraplegjikët, për shurdh-memecët, etj. Natyrisht, më duhet ta theksoj edhe një herë që këto do të jenë tri prioritete kryesore, por puna do të vazhdojë me shumë dimensione.